ដីកាតុលាការច្រើនពេកភ័យលោកកឹម សុខា ស្វែងរកការចរចាជាមួយថ្នាក់ដឹកនាំគណបក្សប្រជាជន
05-May-2016 | ដោយ មែន កំសត់
ភ្នំពេញ៖ លោកកឹម សុខា ប្រធានស្តីទីគណបក្សសង្គ្រោះជាតិ បានធ្វើការទំនាក់ទំនងជាមួយថ្នាក់ដឹកនាំគណបក្សប្រជាជនកម្ពុជាដើម្បី ជួបចរចាគ្នាដោះស្រាយបញ្ហាដែលកំពុងតែកើតឡើង ដោយផ្អែកលើវិប្បធម៌សន្ទនា។ ការស្វែងរកការចរចានេះគឺបន្ទាប់ពីតុលាការបានចេញដីកាកោះហៅលោកកឹម សុខា និងតំណាងរាស្ត្រគណបក្សសង្គ្រោះជាតិ ចំនួនពីររូបផ្សេងទៀត ឲ្យចូលឆ្លើយបំភ្លឺនៅថ្ងៃទី១១ និងថ្ងៃទី១៦ ខែឧសភា ឆ្នាំ២០១៦ ខាងមុខនេះ។
មន្ត្រីជាន់ខ្ពស់គណបក្សសង្គ្រោះជាតិ បានប្រាប់ កាលពីរសៀលថ្ងៃទី៤ ខែឧសភា ឲ្យដឹងថា លោកកឹម សុខាបានទូរស័ព្ទទាក់ទងជាមួយថ្នាក់ដឹកនាំម្នាក់របស់គណបក្សប្រជាជន កម្ពុជា ដើម្បីស្នើសុំជួបចរចាគ្នា រវាងថ្នាក់នាំគណបក្សទាំងពីរដើម្បីជជែកពិភាក្សាទៅលើស្ថានការណ៍ នយោបាយដែលកំពុងតែតានតឹង។ ដោយមន្ត្រីរូបនោះបញ្ជាក់ថា លោកកឹម សុខាបានទាក់ទងគ្នាជាមួយថ្នាក់ដឹកនាំគណបក្សប្រជាជនកម្ពុជា រួចហើយ តែការឆ្លើយតបយ៉ាងនៅមិនទាន់ដឹងនៅឡើយទេ។
ប្រភពបានឲ្យដឹងថា នៅក្នុងកិច្ចប្រជុំផ្ទៃក្នុងគណបក្សសង្គ្រោះជាតិ កាលពីព្រឹកថ្ងៃទី៤ ខែឧសភា ឆ្នាំ២០១៦ គឺបានសម្រេចមិនអោយលោកកឹម សុខា ប្រធានស្តីទីគណបក្សសង្គ្រោះជាតិ លោកតុ វ៉ាន់ចាន់ តំណាងរាស្ត្រខេត្តកណ្តាល និងលោកពិន រតនា តំណាងរាស្ត្រខេត្តបាត់ដំបងចូលឆ្លើយបំភ្លឺនៅតុលាការ នាថ្ងៃទី១១ និងថ្ងៃទី១៦ ខែឧសភា ខាងមុននេះទេ ទាក់ទងបណ្តឹងរបស់កញ្ញា ធី សុវណ្ណថា និងពាក់ព័ន្ធករណីអំពើពេស្យាចារ ដែលមានកញ្ញា ខុម ចាន់ដារ៉ាទី ហៅស្រីមុំ ជាជនរងគ្រោះ។ គណបក្សសង្គ្រោះជាតិ អោយតុលាការធ្វើតាមនីតិវិធីធ្វើលិខិតទៅក្រសួងយុត្តិធម៌ ហើយក្រសួងធ្វើលិខិតទៅប្រធានសភា ដើម្បីដកអភ័យឯកសិទ្ធិសភា។ បើមិនធ្វើតាមនីតិវិធីទេ គឺមិនចូលឆ្លើយបំភ្លឺទេ។
ទាក់ទង ការស្វែងរកការចរចារបស់លោកកឹម សុខា ត្រូវបានឯកឧត្តមសុខ ឥសាន្ត អ្នកនាំពាក្យគណបក្សប្រជាជនកម្ពុជាបានមានប្រសាសន៍ឲ្យ ដឹងថា លោកនៅមិនទាន់បានដឹងពីព័ត៍មាននេះទេ។ ហើយអ្វីដែលលោកកឹម សុខា ចង់មកចរចានេះដូចជាដោះស្រាយមិនចេញទេ ពីព្រោះវប្បធម៌សន្ទនាមិនគ្របលើតុលាការ និងផ្លូវច្បាប់ទេ។ បើទោះបីបានយល់ព្រមជាមួយនឹងថ្នាក់ដឹកនាំគណបក្សប្រជាជនកម្ពុជា ក៏ដោះស្រាយមិនចេញដែររឿងបុគ្គលដោះស្រាយជាលក្ខណៈបុគ្គលលោកកឹមសុខាសាងខ្លួនឯងស្រាយខ្លួនឯង តែការចរចាមិនមានតែព្រោះថ្នាក់ដឹកនាំបក្សប្រជាជននៅដោះស្រាយកាតងារជាតិមិនមែនទំនេរដូចបក្សសង្គ្រោះនោះឡើយ។
លោកបានបញ្ជាក់ថា “ខ្ញុំយល់ថា ការស្វែងរកចរចា គឺគណបក្សប្រជាជន មិនទាន់បានប្រកាសបិទផ្លូវវប្បធម៌សន្ទនាទេក៏ប៉ុន្តែអ្វីដែលខុសពី និយមន័យរបស់វប្បធម៌សន្ទនា យើងមិនអាចធ្វើបាន”។
សូមជម្រាបថា លោកកឹម សុខា ត្រូវបានតុលាការចេញដីកាកោះហៅឲ្យចូលខ្លួនឆ្លើយបំភ្លឺនៅថ្ងៃទី១១ ខែឧសភា ឆ្នាំ២០១៦ វេលាម៉ោង៩ព្រឹក ដើម្បីសាកសួរពីដំណើររឿងកញ្ញា ធី សុវណ្ណថា ប្តឹងពីបទបរិហាកេរ្តិ៍ តាមរយៈខ្សែអាត់សម្លេង។
ចំណែកលោកពិន រតនា និងលោកតុ វ៉ាន់ចាន់ ត្រូវបានតុលាការកោះឲ្យចូលខ្លួននៅថ្ងៃទី១៦ ខែឧសភា ឆ្នាំ២០១៦ ពាក់ព័ន្ធនិងអំពើពេស្យាចារ៕
ចំនួនអ្នកទស្សនា
- ថ្ងៃនេះ7671
- ម្សិលមិញ12561
- សប្តាហ៍នេះ35621
- ខែនេះ57501
- ឆ្នាំនេះ57501
- សរុប20499957